„Jörðin er aðeins eitt ættland og mannkynið þegnar þess“ 

Tilvitnunin hér að ofan er mjög einkennandi fyrir meginstefið í boðskap Bahá'u'lláh, kenningu hans um einingu mannkyns. 

Fyrri opinberendur Guðs sögðu fyrir um framtíðarríki friðar, réttlætis og einingar á jörðinni. Baháʼuʼlláh kennir að þessi tími fari nú í hönd. 

Leiðin að markinu

Eining er nauðsynleg undirstaða allra framfara að sögn Baháʼuʼlláh: „Velferð mannkyns, friður þess og öryggi, verður aldrei að veruleika fyrr en eining þess hefur verið tryggilega grundvölluð.“  Hann staðhæfir jafnframt: „Svo máttugt er ljós einingar, að það getur uppljómað alla jörðina.“

Í ritum sínum bendir Bahá'u'lláh á þau félagslegu atriði sem stuðla að einingu í heiminum. 

•     Sjálfstæð leit að sannleikanum
•     Viðurkenning á einingu mannkyns
•     Viðurkenning á einingu trúarbragða
•     Útrýming hverskyns fordóma
•     Jafnrétti karla og kvenna
•     Útrýming fátæktar annarsvegar og óheftrar auðssöfnunar hinsvegar
•     Allsherjarskyldumenntun 
  
•     Alþjóðlegt hjálpartungumál 
  
•     Samræmi milli vísinda og trúar
•     Heimsbandalag sem tryggir öryggi og einingu mannkyns

Eining í fjölbreytileika

Bahá'í heimssamfélagið endurspeglar þessa hnattvíðu sýn. Það er þverskurður af mannkyninu.

Engin önnur trú er landfræðilega útbreiddari en baháʼí trúin, að kristindómi einum undanskildum. Baháʼí samfélög eru starfandi í meira en 200 löndum. Yfir 5 milljónir manna játa trúna. Hún er einstæð fyrirmynd hvað varðar samlyndi og einingu ólíkra menningarheima. Einkunnarorð hennar eru „eining í fjölbreytileika.“

Íslenskir bahá'íar segja frá kenningum trúarinnar

Tveir vængir

Fyrir rúmlega einni öld var jafnrétti karla og kvenna sett fram í fyrsta sinn í sögu trúarbragðanna af Bahá'u'lláh. Hann lýsti því yfir að konur skyldu njóta sambærilegrar menntunar og karlar og sömu réttinda í  þjóðfélaginu. Bæði karlar og konur munu hagnast á því þegar jafnrétti kynjanna verður að veruleika um allan heim. Í bahá'í ritunum segir: „Hinn mannlegi heimur samanstendur af tveimur vængjum -karlkyni og kvenkyni. Svo lengi sem þessir vængir eru ekki jafnir að burðum, mun fuglinn ekki fljúga. Afburðageta mannkyns mun ekki koma í ljós fyrr en konur ná sömu stöðu, fyrr en þær hasla sér völl á sömu sviðum og karlar; aðeins þá mun mannkyn svífa til hæða raunverulegs árangurs.“

Alþjóðlega bahá'í samfélagið lét gera þessa stuttmynd um jafnrétti kynjanna.